2015年4月3日 星期五

[熊本] 吉鳥 本店:大膽咗!


話時話,喺外國,個人會變得大膽咗。
就講我,讀大學嗰時喺比利時,試過由住緊個鎮踩單車上公路去布魯塞爾,沿途仲有貨櫃車喺隔離駛過,宜家諗番都幾大膽。

今次喺熊本,誤打誤撞行到一間用成隻雞唔同部位嚟做串燒嘅鋪頭
門口放咗個日文餐牌,寫咗唔同部位嘅價錢。
「咪玩啦,餐牌上面全部都係日文,淨係得幾個漢字識睇咋喎,點叫呀大佬!」
如果喺香港,我諗我都會走咗。

好彩,俾我喺餐牌度見到コース呢個字,即係course嘅意思。
雖然唔識睇個course包啲咩串燒,不過都膽粗粗想喺日本試下呢啲串燒鋪。





雞肉丸子



燒雞膶,
食落又粉又軟,完全顛覆咗我對雞膶嘅印象,
原來我一路以嚟食緊嗰種叫「粉硬」,呢串超有驚喜。

燒青椒仔


燒雞胸肉配wasabi,
估唔到雞胸肉都可以整到咁juicy,
咬落去個心係生㗎,如果換轉喺香港食到有半嚿係生嘅話,我會淆淆哋囉。

燒鵪鶉蛋


炸子雞邊個部位最好食?
「仲駛講,梗係雞脾啦。」
俾著我,就會揀雞翼,因為食炸子雞都係為咗食塊皮,而全隻雞相對最多皮嘅部位就係雞翼。
同一道理,燒雞翼燒到塊皮脆卜卜,又點會唔好食。

燒雞皮

燒雞心

燒大蔥

喺香港,都有呢啲用成隻雞唔同部位嚟做串燒嘅鋪頭,不過就貴到喊。
呢度一個course只係2000円,仲要又好食又抵,
所以第二晚即刻想翻兜,不過去旅行梗係要試多啲唔同嘅嘢,
最後誤打誤撞去咗一間食西班牙Paella嘅餐廳,膽粗粗又入咗去。



沒有留言:

張貼留言

Related Posts Plugin for WordPress, Blogger...