[由布院] 御宿ゆふいん亭：Timing

有咩爽得過去日本住一晚溫泉旅館？

答案係住兩晚。

「無聊！」不過除咗講無聊之外，真係無得駁。

入番正題，想爽啲可以住兩晚，肯俾錢就得。但有啲嘢唔係肯俾錢就得，要講Timing。

「吓，住溫泉旅館都要講Timing？」要架，譬如落雪咁，唔係你話落就落，
係咪要講Timing先。

今次去咗九州8日，成個旅程淨係得一日落雪，
仲要係去由布院浸溫泉嗰日落到第二朝就停雪，真係夾都無咁啱。
雖然落雪唔係第一次見，不過落到有成尺厚嘅積雪就真係第一次見。
你諗下，浸緊露天溫泉嗰時落住雪喎，係咪好有feel先。

今次住嘅係御宿ゆふいん亭，
由火車站搭的士入去唔駛跳錶六百幾円，行路就要大概15至20分鐘。
住過日本啲溫泉旅館都知，通常3點先有得check in，
我地12點左右去到，擺低啲行李就出去食飯行街先。

「老虎蟹都行到晚飯前先番。」我以前都會咁諗，
不過宜家寧願早啲番去浸番個溫泉先食飯，
「點解？」因為我睇日劇都係咁囉，
同埋話晒一晚溫泉旅館都唔平，無理由唔嘆番夠本架嘛。

放定兩把遮，呢啲咪叫體貼

招待小食

房入面嗰個私人風呂

入鄉隨族，記得換咗佢先去飯堂食晚飯

「咁呢間御宿ゆふいん亭有咩特別先？」
第一，每間房都係獨立平房形式。
第二，每間房都有私人風呂。

「普通料啫！」係咁架啦，又唔係十萬九千七一晚，你想有幾特別先？

不過房種我就一定揀和室，去得溫泉旅館唔係唔瞓榻榻米下話。

一泊包兩食，

每次住溫泉旅館都好期待佢個晚餐，

又小鉢、又前菜、又蒸物咁好多嘢食，
主菜揀咗豐後牛牛扒，食落幾有油香，不過就無乜肉味。

三軸防震幾堅，夜晚影都幾清

呢條樓梯積咗雪之後跣到hihi

食完晚飯梗係浸番個溫泉先瞓覺，

嗰晚落緊雪，個淋浴區喺室外，隻腳板底踩落地嗰下真係凍到tree根。

好彩落到溫泉就唔覺凍，而且落住雪咁浸堅有feel，
嗰刻覺得場雪真係錦上添花，無得頂！

呢個爐幾過癮，下面明火嚟，就咁放一兩層網就有燒烤效果

第二朝起身例牌浸多次溫泉先食早餐，

早餐入面最鍾意就係燒魚干，鹹鹹香香幾好送飯。

走嗰時原本經久留米轉車去熊本，不過喺久留米眼白白望住到咗都無落到車，

「點解？」Timing唔啱囉。